ജോസഫിന്റെ മൂന്ന് 'പ്രാങ്കുകൾ

ഇന്നത്തെ സോഷ്യൽ മീഡിയ കാലഘട്ടത്തിൽ 'പ്രാങ്ക്' (Prank) അഥവാ മറ്റുള്ളവരെ പറ്റിക്കുന്ന വീഡിയോകൾ വലിയൊരു ട്രെൻഡാണ്. കൂട്ടുകാരെയും വീട്ടുകാരെയും അപ്രതീക്ഷിതമായി പറ്റിച്ച് ചിരിക്കാനും ചിരിപ്പിക്കാനും നമുക്കെല്ലാം വലിയ ഇഷ്ടമാണ്. എന്നാൽ, ആയിരക്കണക്കിന് വർഷങ്ങൾക്ക് മുൻപ് ബൈബിളിലെ പഴയനിയമത്തിലും ലോകോത്തര നിലവാരമുള്ള ചില 'പ്രാങ്കുകൾ' നടന്നിട്ടുണ്ടെന്ന് പറഞ്ഞാൽ നിങ്ങൾ വിശ്വസിക്കുമോ?
അതെ, അതിന് പിന്നിൽ പ്രവർത്തിച്ചത് മറ്റാരുമല്ല; സാക്ഷാൽ ഈജിപ്തിലെ പ്രധാനമന്ത്രിയായ ജോസഫ് തന്നെയാണ്! തനിക്കിട്ട് പണിത, തന്നെ അടിമയായി വിറ്റ സ്വന്തം സഹോദരന്മാർ വർഷങ്ങൾക്ക് ശേഷം ക്ഷാമം കാരണം ധാന്യം വാങ്ങാൻ തന്റെ മുന്നിൽ വന്നു നിന്നപ്പോൾ ജോസഫ് അവർക്ക് കൊടുത്തത് ഒന്നിനൊന്ന് മെച്ചമായ മൂന്ന് തകർപ്പൻ 'പ്രാങ്കുകളാണ്'. ആ രസകരമായ സംഭവങ്ങളിലൂടെയും അതിനുള്ളിലെ ആഴമേറിയ ആത്മീയതയിലൂടെയും നമുക്കൊന്ന് കടന്നുപോകാം.
പ്രാങ്ക് 1: "നിങ്ങൾ ചാരന്മാരാണ്!" (The Spy Prank)
തന്റെ മുന്നിൽ വന്നു വണങ്ങി നിൽക്കുന്ന സഹോദരന്മാരെ കണ്ടയുടനെ ജോസഫ് അവരെ തിരിച്ചറിഞ്ഞു. പക്ഷേ, ഉള്ളിലെ സ്നേഹവും സന്തോഷവും പുറത്തുകാണിക്കാതെ, ഭാവഭേദമില്ലാത്ത ഗൗരവത്തോടെ ജോസഫ് തന്റെ ആദ്യത്തെ 'പ്രാങ്ക്' ഇറക്കി: “നിങ്ങൾ ഈ നാട്ടിലെ രഹസ്യങ്ങൾ ചോർത്താൻ വന്ന ചാരന്മാരാണ്!”
അതുവരെ വെറും ആട്ടിടയന്മാരായി നടന്നിരുന്ന ആ പാവങ്ങൾ ചാരന്മാരുടെ പട്ടികയിലായപ്പോൾ അക്ഷരാർത്ഥത്തിൽ വിറച്ചുപോയി. തങ്ങൾ ചാരന്മാരല്ലെന്നും, ഒരു അപ്പന്റെ മക്കളാണെന്നും അവർ കൈകൂപ്പി അപേക്ഷിച്ചു. ഒടുവിൽ അവരുടെ ഇളയ സഹോദരനായ ബന്യമിനെ കൂട്ടി വരാൻ ആവശ്യപ്പെട്ടുകൊണ്ട്, ശിമെയോനെ തടവിലാക്കിയാണ് ജോസഫ് തന്റെ ഒന്നാം ഘട്ട പരീക്ഷണം അവസാനിപ്പിച്ചത്.
പ്രാങ്ക് 2: "പണം തിരികെ ചാക്കിൽ!" (The Cashback Prank)
ധാന്യങ്ങളുമായി സഹോദരന്മാർ നാട്ടിലേക്ക് മടങ്ങുമ്പോൾ ജോസഫ് തന്റെ ഭൃത്യന്മാരോട് രഹസ്യമായി ഒരു കാര്യം പറഞ്ഞു: “അവർ തന്ന പണമൊക്കെ അവരുടെ ചാക്കിൽത്തന്നെ തിരികെ വെച്ചേക്കുക!”
വഴിമധ്യേ കഴുതയ്ക്ക് തീറ്റ കൊടുക്കാൻ ചാക്ക് തുറന്ന സഹോദരന്മാർ ഞെട്ടിത്തരിച്ചു! ദാ കിടക്കുന്നു കൊടുത്ത പണം മുഴുവൻ ചാക്കിനുള്ളിൽ. സാധാരണക്കാർക്ക് ഇന്നത്തെ കാലത്ത് ഇങ്ങനെയൊരു 'ക്യാഷ്ബാക്ക്' കിട്ടിയാൽ സന്തോഷിക്കും. എന്നാൽ ഇവർ, "അയ്യോ, ദൈവം നമുക്കിട്ട് തന്ന പണിയാണോ ഇത്?" എന്ന് ഓർത്ത് ഭയന്ന് വിറച്ചു. തിരികെ നാട്ടിലെത്തിയപ്പോൾ അപ്പനായ യാക്കോബിനോട് പോലും ഈ കാര്യം തുറന്നുപറയാൻ അവർക്ക് പേടിയായിരുന്നു.
പ്രാങ്ക് 3: "വെള്ളിപ്പാത്രം മോഷ്ടിച്ച കള്ളൻ!" (The Royal Setup Prank)
ഇതാണ് കൂട്ടത്തിൽ ഏറ്റവും മാരകമായ 'പ്രാങ്ക്'. രണ്ടാമതും ധാന്യം വാങ്ങാൻ ബന്യമിനെയും കൂട്ടി അവർ വന്നപ്പോൾ ജോസഫ് അവരെ നന്നായി സൽക്കരിച്ചു. എന്നാൽ അവർ മടങ്ങാൻ നേരം തന്റെ പ്രിയപ്പെട്ട വെള്ളിപ്പാത്രം ബന്യമിന്റെ ചാക്കിൽ ഒളിപ്പിച്ചു വെക്കാൻ ജോസഫ് കൽപ്പിച്ചു.
അവർ കുറച്ചുദൂരം പോയപ്പോൾ ജോസഫിന്റെ ആളുകൾ പിന്നാലെ ചെന്ന് വണ്ടി തടഞ്ഞു പരിശോധിച്ചു. ബന്യമിന്റെ ചാക്കിൽ നിന്ന് വെള്ളിപ്പാത്രം പുറത്തെടുത്തപ്പോൾ സഹോദരന്മാരുടെ സകല നിയന്ത്രണവും നഷ്ടപ്പെട്ടു! അവർ വസ്ത്രം കീറി നിലവിളിച്ചു കരഞ്ഞു. ഒടുവിൽ ബന്യമിനെ അടിമയാക്കാൻ ജോസഫ് ഭാവിക്കുമ്പോൾ, യൂദാ മുന്നോട്ട് വന്ന് ബന്യമിന് പകരം തന്നെ അടിമയാക്കാൻ അപേക്ഷിക്കുന്നിടത്താണ് ഈ 'പ്രാങ്ക് പരമ്പര' അതിന്റെ പാരമ്യത്തിലെത്തുന്നത്.
മാറ്റത്തിന്റെ ആഴവും അണപൊട്ടിയ സ്നേഹവും
വർഷങ്ങൾക്ക് മുൻപ് വെറും ഇരുപത് വെള്ളി നാണയങ്ങൾക്ക് വേണ്ടി സ്വന്തം അനിയനായ ജോസഫിനെ അടിമയായി വിൽക്കാൻ മുന്നിൽ നിന്ന അതേ യൂദയാണ് ഇപ്പോൾ (ഉല്പത്തി 37:26-27), മറ്റൊരു അനിയനായ ബന്യമിന്റെ സ്വാതന്ത്ര്യത്തിന് വേണ്ടി സ്വന്തം ജീവിതം അടിമത്തത്തിലേക്ക് എറിഞ്ഞു കൊടുക്കാൻ തയ്യാറാകുന്നത്! സ്വാർത്ഥതയിൽ നിന്ന് ആത്മത്യാഗത്തിലേക്കുള്ള യൂദായുടെ ഈ വലിയ മാറ്റം കണ്ടപ്പോൾ, യൗസേപ്പിന് തന്റെ ഉള്ളിലെ സ്നേഹം അടക്കി നിർത്താൻ കഴിഞ്ഞില്ല.
ജോസഫ് തന്റെ സഹോദരന്മാരോട് കാണിച്ചത് വെറുമൊരു പ്രതികാര ബുദ്ധിയോടെയുള്ള പറ്റിക്കലായിരുന്നില്ല. തന്നെ ക്രൂരമായി വിറ്റ സഹോദരന്മാർക്ക് ഇപ്പോൾ മനംമാറ്റം വന്നിട്ടുണ്ടോ എന്ന് പരിശോധിക്കാനായിരുന്നു ആ പരീക്ഷണങ്ങൾ.
തന്റെ മുന്നിൽ നിൽക്കുന്ന ഭൃത്യന്മാരോടും ഈജിപ്തുകാരോടും "എല്ലാവരും എന്റെ മുന്നിൽ നിന്ന് പുറത്തുപോകുവിൻ" എന്ന് യൗസേപ്പ് ഉറക്കെ കൽപ്പിച്ചു.
കൊട്ടാരത്തിൽ സഹോദരന്മാർ മാത്രമായി അവശേഷിച്ച ആ നിമിഷം, സിംഹാസനത്തിന്റെ ഗാംഭീര്യവും പ്രധാനമന്ത്രി എന്ന പദവിയും മറന്ന് യൗസേപ്പ് ഉറക്കെ പൊട്ടിക്കരഞ്ഞു! ആ കരച്ചിലിന്റെ ശബ്ദം കൊട്ടാരത്തിന് പുറത്തുള്ളവർ പോലും കേട്ടു.
"ഞാൻ നിങ്ങളുടെ സഹോദരനായ യൗസേപ്പാണ്! എന്റെ അപ്പൻ ജീവനോടെയിരിക്കുന്നുവോ?" എന്ന് കരഞ്ഞുകൊണ്ട് ചോദിച്ചപ്പോൾ സഹോദരന്മാർ സ്തബ്ധരായി നിന്നുപോയി. ഭയന്നുവിറച്ചു നിന്ന അവരെ നോക്കി യൗസേപ്പ് സ്നേഹത്തോടെ പറഞ്ഞു: "നിങ്ങളെന്നെ ഇങ്ങോട്ട് വിറ്റതുകൊണ്ട് ഇപ്പോൾ വിഷമിക്കുകയോ ഭയപ്പെടുകയോ വേണ്ട. ദൈവം ജീവനെ സംരക്ഷിക്കാൻ എന്നെ നിങ്ങൾക്ക് മുൻപേ അയച്ചതാണ്." തുടർന്ന് അവൻ ബന്യമിനെയും മറ്റ് സഹോദരന്മാരെയും കെട്ടിപ്പിടിച്ചു ചുംബിച്ചു കരഞ്ഞു. ആ കണ്ണീരൊഴുക്കിൽ വർഷങ്ങളായുള്ള വിദ്വേഷത്തിന്റെയും അസൂയയുടെയും കറകളെല്ലാം കഴുകിപ്പോവുകയായിരുന്നു.
ഈ സംഭവം നൽകുന്ന ആത്മീയ സന്ദേശം
ജോസഫ് തന്റെ സഹോദരന്മാരോട് കാണിച്ചത് വെറുമൊരു പ്രതികാര ബുദ്ധിയോടെയുള്ള പറ്റിക്കലായിരുന്നില്ല. തന്നെ ക്രൂരമായി വിറ്റ സഹോദരന്മാർക്ക് ഇപ്പോൾ മനംമാറ്റം വന്നിട്ടുണ്ടോ എന്ന് പരിശോധിക്കാനായിരുന്നു ആ പരീക്ഷണങ്ങൾ. ബന്യമിന് വേണ്ടി സ്വന്തം ജീവൻ കൊടുക്കാൻ പോലും യൂദ തയ്യാറായതോടെ അവരുടെ ഉള്ളിലെ പഴയ അസൂയ മാറി സ്നേഹം നിറഞ്ഞിട്ടുണ്ടെന്ന് ജോസഫ് തിരിച്ചറിഞ്ഞു.
മറ്റുള്ളവരെ അപമാനിച്ചും വേദനിപ്പിച്ചും ചിരിക്കുന്ന ഇന്നത്തെ വിലകുറഞ്ഞ പ്രാങ്കുകളുമായി ജോസഫിന്റെ പ്രവൃത്തിയെ ഒരിക്കലും താരതമ്യം ചെയ്യാൻ കഴിയില്ല. നമ്മുടെ ജീവിതത്തിലും ദൈവം ചിലപ്പോൾ ഇത്തരം കഠിനമായ പരീക്ഷണങ്ങൾ അനുവദിക്കാറുണ്ട്. അത് നമ്മെ തകർക്കാനല്ല; മറിച്ച് നമ്മുടെ ഉള്ളിലെ സ്നേഹവും വിശ്വസ്തതയും എത്രത്തോളമുണ്ടെന്ന് അളക്കാനും, പരസ്പരം ക്ഷമിച്ചും സ്നേഹിച്ചും നമ്മെ കൂടുതൽ നല്ല മനുഷ്യരാക്കി മാറ്റാനും വേണ്ടി മാത്രമാണ്.
Sr. Feba Mary Mathew
IPC Gospel Centre, Ras Al Khaimah
