About

അക്ഷരങ്ങളിലൂടെ
ക്രിസ്തുസ്നേഹത്തിന്റെ കാഹളധ്വനി!

വായനയുടെ വസന്തങ്ങൾ അകന്നുപോകുന്ന ഈ ആധുനിക യുഗത്തിൽ, ദൈവമഹത്വത്തിനായി അക്ഷരങ്ങളെ വീണ്ടെടുക്കുക എന്ന ലക്ഷ്യത്തോടെയുള്ള ഒരു ഓൺലൈൻ എഴുത്തിടമാണ് 'യുവജന കാഹളം'

ഹൃദയങ്ങളിൽ ആത്മീയ ചൈതന്യവും സ്വർഗീയ ധ്യാനചിന്തകളും ജ്വലിപ്പിക്കുന്ന കഥകൾ, കവിതകൾ, ലേഖനങ്ങൾ, ഓർമ്മക്കുറിപ്പുകൾ എന്നിവയിലൂടെ പരസ്പരം ആത്മീയ വർദ്ധന വരുത്തുവാൻ ഈ പ്ലാറ്റ്ഫോം വഴിയൊരുക്കുന്നു. യുവതലമുറയുടെ ചിന്തകൾക്കും ആത്മീയ പ്രയാണങ്ങൾക്കും കരുത്തുപകരുന്ന ഈ അനുഗൃഹീത യാത്രയിൽ, യുവജനത്തുടിപ്പോടെ അവിടുത്തെ സ്നേഹം ലോകത്തിന് പകർന്നു നൽകുവാനുള്ള ഒരു വിനീത ശ്രമമാണിത്

തിരുവചനത്തിൽ 'കാഹളം' എന്നത് കേവലം ഒരു ശബ്ദമല്ല; അത് ദൈവത്തിന്റെ സാന്നിധ്യത്തിന്റെയും വിടുതലിന്റെയും യുദ്ധവിജയത്തിന്റെയും പ്രഖ്യാപനമാണ്. സീനായ് മലമുകളിൽ ദൈവസാന്നിധ്യം വെളിപ്പെട്ടപ്പോഴും, ഇസ്രായേൽ ജനം യെരീഹോ മതിലുകളെ തകർത്തു വിജയം വരിച്ചപ്പോഴും, ഗിദെയോന്റെ മുന്നൂറ് പടയാളികൾ മിദ്യാന്യർക്കുമേൽ ആത്മീയവിജയം നേടിയപ്പോഴും കാഹളനാദം ഉച്ചത്തിൽ മുഴങ്ങിയിരുന്നു. യെരീഹോ മതിലുകളെ തകർത്ത ആ കാഹളനാദം പോലെ, തിന്മയുടെയും വിഭാഗീയതകളുടെയും പാപത്തിന്റെയും കോട്ടകളെ തകർത്ത് ക്രിസ്തുവിന്റെ സ്നേഹം അക്ഷരങ്ങളിലൂടെ പ്രഖ്യാപിക്കുന്ന ഒരു യുവജന മുന്നേറ്റമാണ് ഈ മാധ്യമം.

"അവനിലല്ലോ നാം ജീവിക്കയും ചരിക്കയും ഇരിക്കയും ചെയ്യുന്നത്; അങ്ങനെ നിങ്ങളുടെ കവിവരന്മാരിലും ചിലർ: ‘നാം അവന്റെ സന്താനമല്ലോ’ എന്നു പറഞ്ഞിരിക്കുന്നു." (അപ്പൊസ്തലപ്രവൃത്തികൾ 17:28) എന്ന തിരുവചനത്തിന്റെ അടിസ്ഥാനത്തിൽ, ക്രിസ്തുവിന്റെ പരമയാഗത്തിന്റെ സ്നേഹത്തിൽ എല്ലാവരെയും ഒരുമിപ്പിക്കുന്ന ഒരു ആത്മീയ കാഹളമായി 'യുവജന കാഹളം' ഇവിടെ മുഴങ്ങുന്നു. നമുക്ക് ഒന്നിച്ച് മുന്നേറാം, അക്ഷരങ്ങളിലൂടെ വീണ്ടും എഴുതിത്തുടങ്ങാം!